ah44216

Gaude superna civitas nova frequentans cantica | Adcrescit tibi dignitas murorum surgit fabrica | Faber et fabri filius te restaurant in melius | Fabri mens et industria relucet in materia | In tua transit moenia Marcellus gemma praesulum | Tibi praesens ecclesia praesentat hunc carbunculum | Chorus concordi spiritu psallat in ejus transitu | Grex pastoris miracula retractet mente sedula | Dum ferrum candens ponderat adhuc aetate tenera | Calorem tactu temperat ferri praedicit pondera | Dum servus Christi praesuli ministrat aquae calicem Christus ad laudem servuli mutat in vinum laticem | Nec minus est miraculum quod succedit in ordine dum ferens aquae vasculum haurit chrisma de flumine | Vinum et chrisma praesulis praeferebant indicia per quem baptisma populis per quem sacratur hostia | Gradu minor quam meritis vocem laxat antistis promotus in pontificem fert opem reo duplicem | Sacris astans altaribus vinctum videt in populo solvit a poenae nexibus et a peccati vinculo | In serpente visibili triumphat invisibilem sic Christus invincibili virtute ditat humilem | Marcelle pater respice nos pietatis oculo | Sub hujus adhuc lubricae carnis gements vinculo | Te diligentes unice te recolentes sedulo | Consors lucis angelicae caeli suscribe titulo