ah40342

Summo rerum conditori sit in arce summa poli honor et tripudium | Sphaera mundi teres orbis caelum pulset lira cordis vocis ad praeludium | Praeco ducis lux Indorum Thoma caesor idolorum veri patens nuntius | Hoc festivo nos illustrat die nostras et venustat mentes bene conscius | Qui structurus aulam regi carpit iter nutu dei missus a Caesarea | Post ut felix paranymphus conjugatis monstrat intus quae sit lucis area | Inter dapes sanctus orans tulit palmam velut ovans a pincerna principis | Ultor leo Thomae sancti certas vindex nefas tanti piat morte sceleris | Tunc accessit ad regale castrum iter per navale sanctus Eliophorum | Rex salutat adventantem regem Thomas ut ovantem instruit Gundoforum | Prima strues est baptismus fundamentum jacit Christus verbi Thoma bajulo | Quem antistes idolorum penetravit ob deorum stragem truci gladio | Vincis jure mundi jura te exercet via dura necis per artifices | In futuro tuae palmae fac nos esse victor alme Thoma comparticipes