ah42205

Splendor Christi sacerdotis et vicinis et remotis praeminet cum gloria Lux Cuthberti fulget late corporis integritate nec est transitoria | Incorrupta vernat caro quam decore rex pareclaro caelestis magnificat Cujus festo caelum plaudit cujus terra laudes audit et videt et praedicat | Parvuli triennis ore pontificali decore ornandus asseritur Angelo docente Dei caelo missa salus ei in genu perficitur | Pene mersos in profundo prece sancta corde mundo littori restituit Animam ad caelos vehi Aidani viri Dei videre promeruit | Panes nivei candoris de supernis videt horis tres allatos caelitus Quos per angelum de caelis ministrari vir fidelis applaudit medullitus | Belvae dum de profundis gradiuntur maris undis illi dant obsequia Futuri diem sereni praedicit sermone leni vi praeclusis noxia | Lympham sibi Deus dedit heremita quo resedit ex humi duritia Regem cito moriturum seque praesulem futurum certa dat indicia | Quem ab arbore cadentem caelos videt ascendentem ejus narrat premia Mysticis Christi refectus sacramentis et protectus transit ad caelestia | Sunt miracula perplura obsistente quae natura per hunc fiunt inclita Haec ad laudem Dei crescunt abdita nec delitescunt sancti viri merita | Integris in urna pannis quadringentis decem annis et octo dormierat Nec putredo nec vetustas immo splendor et venustas illum circumdederat | Caput tuum rex Oswalde vir dilecte Deo valde haec theca servaverat Et Bedae sancti doctoris qui caelestis est odoris ossa recondiderat | Fragrans odor supernorum hos perfudit balsamorum qui praesentes aderant Qui in carne Dei virum incorruptum dictu mirum videre meruerant | Odor ergo nos caelestis moribus comat honestis ut fruamur caeli festis in sanctorum gloria Amen